നമാക്കു തിലെനോവുബന്തെങ്കി ആച്ചുപത്തിരത്തെക്കു ഓടദെ ചെറിയ നോവുക്കുള മരുന്തു കുള്ളിലിന്തു ചെയിദുനോക്കൊണു. പരാങ്കിക്കായി, ചീരെചൊപ്പു, ബെള്ളെലിക്കായി, എളിനീരു, നാരങ്ങെ ഏനൊക്ക ഒരു ജിനാമെങ്കില തിന്നൊണു. ഏലകായി, ചുക്കു, ജീരഗെ കണാക്കായി എടുത്തു പൊടി മാടിച്ചു അയിൻറൊൻറ കലുക്കണ്ടിമു പൊടിയാക്കിച്ചു ഒൻറ കുളാറിക്കാൻറു കുടിക്കൊണു. ബെളുത്തുള്ളി ചച്ചിച്ചു മേവെക്കു ചേക്കൊണു. ചുക്കിഞ്ചി മുലെപാലിലിയോ, കഞ്ചിനീരിലിയോ, എളിനീരിലിയോ അരേച്ചു മേവെക്കു ചേക്കൊണു. മല്ലിചൊപ്പുമു, ചന്തനമു ഒൻറഅരേചിച്ചു മേവെക്കു ചേക്കൊണു. കുറെ മഞ്ചളു എടുത്തിച്ചു ബേപ്പെണ്ണെക്കു മുക്കിച്ചു എണ്ണെത്തിരി കത്തിചിച്ചു പുഗെത്തട്ടിക്കൊണു. തഗെരെ ചൊപ്പുമു ബെല്ലമു ഒൻറഅരേചിച്ചു പയിബാറുക്കു കുടിക്കൊണു.